療癒之旅: 我遇上了和諧粉彩

我本來係一名返朝九晚五嘅白領打工仔。朝九晚五當然唔係放五，係日日返工冇收工嗰種。生活迫人，最難頂係成日都要entertain腦細，晚晚夜收工返到屋企仲要睇屋企人面色，過著根本係唔係人過嘅生活。

有段時間真係長期唔開心咗好耐。雖然身邊都有好多豬朋狗友陪我，得閒去下飯、飲下野，當係慰勞下自己，感覺又好似冇乜野。香港人指定動作，每年都起碼去一次旅行。記得好幾次去完旅行，坐回程機要返香港，臨起飛時都會好傷感，不其然喊咗出嚟😭。我先發覺，原來其實去旅行，只係逃避，根本治標唔治本。放完假，我真係幾唔想返去再過嗰種toxic life。

雖然係咁，但香港人吖嘛，梗係頂硬上啦。就係咁，我一直唔理身體發出嘅警號，最後長期偏頭痛、膊頭痛、腸痛都走晒出嚟。最後俾個變態腦細玩，玩到我情緒崩潰，不停坐喺公司個位度喊。最後因為咁，我冇辦法再唔理自己。😫

嗰陣我去睇咗好多醫生，之後做埋全身檢查，其實都搵唔到咩問題。最後有個醫生就直接開精神藥俾我。我覺得或者仲有其他方法，所以之後我讀咗好多療癒課程，又去學做冥想，開始知道原來要聆聽自己多啲。直至2018年，我遇上了和諧粉彩。✨

其實，細個真係好鍾意好鍾意畫畫。不過讀中學時因為學校同屋企唔鼓勵，所以我就放棄咗，之後一直冇咗執筆畫畫。第一次喺網上見到和諧粉彩嗰刻，就即刻有一股衝動去學，所以我就報咗JPHAA和諧粉彩準指導師課程。連續三個週末上堂，由乾粉彩基本步開始學，最後畫晒20幅畫，真係好有滿足感。呢個過程亦令我記返起，小時候畫畫嘅快樂。因為和諧粉彩係用手指畫，所以真係好chill好relax，我諗其實我就係需要嗰種作畫時嘅放鬆感覺。🌸

和諧粉彩是日本細谷典克老師於2003年時創立的。大部份體驗過和諧粉彩的參加者和指導師都認為和諧粉彩作畫的過程能帶給他們放鬆的感覺。

因為和諧粉彩，我再次畫返畫。☺️唔知有哪來嘅勇氣，讀完準指班，我就開始搞工作坊。或者當你搵到自己熱愛嘅野，就會不惜一切就算幾攰都好想去做。當刻我嘅人生都開始改變，我辭咗我嗰時令我透不過氣嘅工，離開咗變態腦細，然後轉咗去一個更好嘅工作環境。就係咁，我再唔駛點OT，我又可以開始做返我自己鍾意嘅事。💖

當我繼續畫畫，做更多自己喜歡嘅事，多咗聆聽自己內在，我嘅內心亦慢慢療癒起來。而家，我係一位全職嘅和諧粉彩正指導師，希望透過畫畫和教學為身邊嘅人帶來光芒，繼續努力去活出我的故事下集。❤️‍🔥

希望你都能搵到你生活中嘅熱情！加油啊！🥰

如果你想知道更多有關和諧粉彩嘅資訊，歡迎按此或WhatsApp聯絡。😸